Ша рахан чун лезги ч1алал

Интернетдин чилини
Ч1угур заз бирдан
"Лезгияр" дестедикай
Атана са ван.

Гъурбатдавай, чкадин
Ватанэгьлийри
"Одноклассникра"десте
Тешкилнавай и.

Гьахьна зуни, тамашна,
Акуна агьвал,
Сад- садахъ чун рахазва
Чаз чара ч1алал.

Ч1ехи ватан Россия
Я зазни багьа,
Зун гьамиша гьазур я
Гъиз адал барка.

Амма,къвемир хъел садаз,
Хайиди амаз,
Жедач завай багърийрихъ
Тахайдал рахаз.

?Ша рахан чун лезгидал!?-
Кхьена гафар,
Са геренда алт1ушна
Лекьерин лужар.

Дидед лайлай к1анибрун
К1ват1 хьана к1ват1ал,
Куьре, Ахцегь, Самур пад,
Шегьерар яргъал.

Лата, Анар,Гюзеля,
Сифтени –сифте
Гьай гана зи гьарайдиз,
Атанай к1венк1ве.

?Ша рахан чун лезгидал?-
Зирек я к1ват1ал,
Ватандашрин вафалу
Хуьдай к1вал,чил,ч1ал! 2.03.2013йис