Гьарда вичин макьамдал

Гьайиф рухваяр дидейрин лезги,
Лекьер яз хана, арш такур вилиз.
Цифер алатна, тарихдин гуьзгуь,
Сагъ яз амукьда несилри кIелиз.

Гьар са патандаз, вич кьун патал шагь,
Сифте нубатда рекьида игит.
ЭкъичнаватIа гьидан пара ягь,
Гьадаз аквада халкьар яз чигит.

Гьар сада вичин тваз къанун, къайда,
МискIинар чIуриз, эцигда муькъвер.
Дуьз тир тахтадиз,чIуру тир ранда
Ягъиз авунай,луькъверни синер.

Буьркьуьда - экуь акъудда вилер,
КьецIид алахъда галудиз гардан.
Эй адалатлу, зи лезги эллер,
ЦIални ивидал лигимрай гьулдан!

КIантIа фарс хьурай, кIандатIа араб,
КIантIа туьрк хьурай, кIандатIа урус;
Як алажна чи, жакьвана кIараб,
Чаз гьалал тIуьрди авунач турус.

Гьи кьвадар хуьрер дуьзарна чилив?
Гьикьван есирар ганатIа маса?
Шалбуз дагъ рахаз, Каспидин гьуьлуьв,
Дердер пайнатIа шумуд виш йиса?

Чилер къакъудиз, чIал ийиз кIанз терг,
ЦIун мукалралди гвенай чи никIер.
Абурун ина вуч авайтIа мерг?
Чапхунчивилив ацIанвай рикIер.

КIвачерик чи чил, кьилел уртах рагъ,
Къул тирвал кIвачер гадарна жуван;
Чаз бес я Аран, Шагьни, Шалбуз дагъ.
Бес я чаз чи яд, чи фан кIус яван!

Эгер мугьман яз атанватIа чахъ,
Ша, буюр. Илиф, кефер чIугу квез.
Эгер аватIа чIуру тир къаст квехъ,
Гуьнуькъарадин йифер чIугу квез.

Дидеяр сагърай игитар хайи,
Гьар сад са аслан шарагар жеда.
Душмандин вилик намусар хвейи,
Садни рекьидач, тIурфан, гар жеда.

Гьар садаз вичин велед я ширин,
Гьар садаз вичин чIал я багьа затI.
Дидедин чIалал лугьунни хъуьруьн,
АватIа яраб, рикIиз дава-затI?

Агъзур йисара женг чIугуна чав,
Лигим хьана чун гьулдан барамбар.
Шумуд гьампади ягъна чина ав?
Чпин кIарабрин туна лагь, гьанбар?

ТIимил акуртIан кьадардиз пара,
ВикIегь рикIерин рухваяр я чун.
ЦIийи бегьерар гъиз вердиш тара,
Къадим лезгийрин балаяр я чун.

Тек сад амай кьван амукьда чи чIал,
Тек сад амай кьван амукьда чи чил.
Къадим лезги тIвар алама къе чал,
Жеч чи агъада, вине авай кьил!