Гуьзетмир

Къацу багъда зун хьанай вал гуьруьшмиш,
Вучиз,гуьзел, лугьузва заз гуьзетмир?
Ви багъ-бахча хьанва мадни безетмиш,
Вучиз,гуьзел, лугьузва заз гуьзетмир?

Фикир мийир дуьньядин амалдикай,
Минет я ваз,хабар хьухь зи гьалдикай,
Йифди-югъди рикlевай хиялдикай,
Вучиз, гуьзел, лугьузва заз гуьзетмир?

Зун Азиз,вун Теллидиз ухшар авай.
Бахтавар хьуй,-шартlариз кьадар ава!
Суалризни кlани жавабар ава,
Вучиз, гуьзел, лугьузва заз гуьзетмир?

Экуьн сегьер къвезва,нур гваз, кьилив зи,
Зун акунай шукур хьайдаз сефилдиз,
Килигзава ви суьрет-ви шикилдиз,
Вучиз, гуьзел, лугьузва заз гуьзетмир?

Ийизва за ви буй-бухахдин тариф,
Ваз килигиз мадни жезва зун зайиф,
Лугьун тахьуй,-Пагь,жегьилвал, вун гьайиф!
Вучиз, гуьзел, лугьузва заз гуьзетмир?