Т1вар инсандин къамат я 16

Зинданни, лагьайт1а, гьак1ан са т1вар я-
Рак1арарни гар къекъведай чапар я.

Уф гайит1а, ачух жезва къецелди,
Т1убни галай туш рак1арихъ кьекьелдин.

Амма гьиниз катда жуван т1вар туна,
Шел-хвал ийиз к1вале авай яр туна.

Т1вар-инсанди къазанмишай къамат я,
Гьуьрмет авай т1вар еке са савкьат я.

"Т1вар кьац1урмир" гафарни я гьавай туш.,
Т1вар тахьайдахъ я къаматни авай туш.

Пар хьиз агъур жеда т1вар ви къуьнерал,
Агъурвиляй гьуьрмет жеда кимерал.

Сад ч1угвада кьац1ай т1варц1и чилериз,
Сад акъудда лувараллаз цевериз.

Гьавиляй ам ацукьнава килигиз,
Варзни ава чапард кьулай тебрикиз.

Сейдадин чин карагзава мелек хьиз,
Хияларни къвезва агъур гьелек хьиз.

Чир хьанайт1а гьинват1а дуст Масанни,
Уьзягъ тир хьи ва гьак1дани хъсанни.

Нифретзава зайифвалур герендиз,
Лянет хьурай шит мецеллай буьгьтендиз.

Кар хьайидлай кьулухъ акьул гзаф я,
Садни жедач виликамаз, инсаф яз.

Марвардин, ни фикир гуда цацариз,
Хуш атирар чк1урзавай яргъариз?

Назик мелек акурдан рик1 ц1рада,
Муьгьуьбатди вичин нехиш храда.