И. Крылов. Люкь ва арф - Орёл и пчела

И. А. КРЫЛОВ

ЛЮКЬ ВА АРФ

Бахтлу кас ву - чан зегьмет вуйир адлу:
Дицир чан игитвал вари дюн`яйиз
Рябкъюрайвали апIуру кьувватлу.
Гьаци лайикьлур ву, халкьдиз аьгъдарди,
Зегьметнан ва эргбан кьимат адарди,
Я аднахъ, я гьюрматнахъ хъидривди ул,
Чав уж`валнак пай киврайвал`ин шадди,
Ккебехъну лихурайир, ис дапIну кIул.

Сабан, дябкъну кюкдилан чарх туврай арф,
Дидиз люкьру кIуру гьамциб кубччвру гаф:
?Гьарган яв язухъди шулзуз, бейнава,
Гьяйиф яв зигру зегьмет ва устадвал!
Агъзрар`инди шулчва сахаъ, рягъ дубззри,
СатIи йишвягъ яв кьимат тувуб гъубззри,
Яв ляхин жара апIуз шлихьан шулу?
Мюгьтал вуза, фти апIури аш аьшкьлу,
КIулди уьмриъ зат мялум дарди лихуз,
Гьаци мялумсузди вардихъди йихуз!
Фукьан аьхю фаркь`вал аш ихь арайиъ!
Узу, хлинццари ушвт хъипри, гьавайиъ
ТIибхру вахтна, ккапIну завун яркьу урчI,
Вари йишвариъ рабгъури шулза гучI:
Зикв алидар карсри шулу жиларик,
Гъалаб кабхъру сюрйирихъ марччлихънарик;
Дири жейранарихьан хутIлариз гъюз
Шулдар, гучI кади нагагь узуз рякъюз.?
Арфли жаваб тувру: ?Аьхюб вуяв ад!
Аллагьди хъана туври увуз къудрат!
Хъа узу вардиз уж`валназ халкь дапIна,
ГъапIуб улупбаъ рябкъюрдариз мяна;
ЧIяаьн шулиз, гъилигиган рягъяриз,
Дурариъ саб литIансибкьан йиччв аш йиз?.


Табасаран чIалназ илтIибкIур Э. Аьшурбегова