К. Бальмонт. Я буду ждать

?Гуьзетда за?
Гуьзетда вун, заз азабар гьа физ-физ,
Йисаралди гуьзетда за.
Лугьуз желбиз, алцурариз на верциз,
Гафар гузва заз гьамиша.

Вун-секинвал бахтсузвилин чIавара,
Вун са экв я мичIе чилин.
Жуваз бегьем аян тушир наварин
Вахъ аламат гала ширин.

Чинал алай хъвер даим чуьнуьхиз,
Гардан вуна ийида кIир.
Къекъведайла вун гьа бухах юзуриз,
Къушари хьиз ериш квачир.

Алахъзава зи гьиссер на уях таз.
Чуьнуьхзавач накъварини,
Килигзавай, акъваз туна кьуд патаз,
Вафа квачир а вилер ви.

Заз чидач, ваз кIани ятIа гуьгьуьл хуш,
Агудна зи пIузанив пIуз,
Амма заз я верцивилин са кукIуш -
Вун патав хьун гьар са чIавуз.


Заз чидач, вун ажал ятIа хабарсуз ,
Я тахьанвай гъед я цавун.
Гьик ятIани, гуьзетда за кьадарсуз,
Гуьзетда за гьамиша вун.
(перевёл на лезгинский Билал Адилов)